Mahdi

Dr Mahdi (arabisch المهدي‎, Partizip Passiv mit dr Bedütig „gfüert“, „gläitet“ bzw. „dä wo rächt gläitet isch“; im Persische und e baar arabische Dialäkt au as Mehdi usgsproche) isch noch dr dradizionelle islamische Glaubensuffassig dr Messias, wo vo Gott gschickt wird und wo in dr Ändzit s Unrächt uf dr Wält wird abschaffe. Im Koran het s käini klaare Ussaage über e Messias, wo am jüngste Daag söll erschiine. Dr Glaube ass dr Mahdi wurd choo isch e zentrale Bestanddäil vo dr schiitische Konfessioon und isch au in de chiliastische Erwartige im sunnitische Islam verbräitet und wird entsprächend in de kanonische Dradizionssammlige in dr Form vo Hadith daargstellt.